Sage "Dr Heiwdiäb"

Ich bin im Chiiplwald im Holz gsin. Fr schich uis z ruäwä han ich mich än äm Lerch angwalbäd und än Tossär gnon. Uf einmal chemnd zwei Meitschini us dm Chiipldorf dr di Wald inbruächa und sägänd mr, ich sellä su schnäll als meglich heim chon. Ich han d Agscht uf d Aggslun gnon und bin bid ihnän grad dr di Wald unauis.

Im obri Elsign sin mr zuä äm Schirli chon. Da sind d Meitschini beidu än mich gschprung, heind schich miär in d Rocksek kcheicht und gseid: In där Schir ischt denn äs Unkchiir, äs chund da einä ga Heiw fassun. Ä paa, chend deichn! Han ich nä gseid. Schiirtiir ischt offni gsin und ich han än Blick in d Schiir gitan. Vrflixt nuch einischt! Da ischt wirklich einä im Hirtuhemm än dr Heiwbletschu gschtan und hed Heiwegfassud. Wiä ich ni gfregäd han: Was machuscht du da? Hedr schich unmkcherd und hed gseid: Ich han hiä äs malsch Heiw gschtoln und muäss darum hiä gan Heiw fassun. Chan dr äs waas hälfn? Han ich nin gfregäd. Um Gottschwilln tuän fr mich dänän Liitu hiä ä Meis Heiw zrrugg. Suscht han ich danna ubr kei Ruhä. Duä bin ich erwachäd?